ماشفتش حد يشبهني
مابين الأه
وبين الأه
أهات ياما ماعدتهاش
حوالي...
بلاش
ورق غصن الشباب خرف
ومتطرف
ف حجر ربيع ماهوش قادر
يفوت الورد ويسافر
يشد أديه ف المحنه
يرد العقل للماضي
حضاره بتنفجر توابيت
بقولك أيه
تعالى نفنط الكوتشينه م الأول
أكيد زي وزيك ناس
مابتملش تقوم تلعب
قمار فاجر
بيفصلنا
يفصلنا
عرايس خيط
نقوم نسأل عن الكسبان
يرد سؤالنا ميت خسران
ف لعب الدنيا والأحوال
محال تكسب
مادام الفاجره بتعلم
بناتنا الدين
ولص كبير
بيقطع أيدي لما أسرق
عشان غلبان
وبسرق طقه على قدي
تشبع أبن كان عيان
بقولك أيه!!!
ماشوفتش حد يشبهني
ف سراب حواديت
ماحدش قالك السر
اللي انا شايله
ف قلب محيط
بقى يعني
بحق العمر والشده
مصدق أن دا عمري
منين الشيب
حرق مني سواد شعري
خطوط تجاعيد بتقسمني
شبح مدبوح
صحيح كان نفسي تسألني
حبيبتك فين؟؟؟
رمت السلام
من كام خريف
أكمني ماعرفتش أكون
فارس ف أسطورة غرام
قلب الأميره الطيبه
وأنا بوست أسمي
اللي أنتفض فوق كتفها
ضحكة وليد
ماقدرتش أبقى ف يوم
أبوه
............................
