"جحــــــا".....هشام الجخ.......مفيش كلام يوصف روعتها و ....و ألمها ؟؟!!!

منقول للامانة..


شعور سخيف
إنك تحس بإن وطنك شيء ضعيف
صوتك ضعيف
رأيك ضعيف

إنك تبيع قلبك وجسمك
وإنك تبيع قلمك وإسمك
ما يجيبوش حق الرغيف

سألوا جحا عن سر ضحكه
قالك أصل اتنين وشبكو
اللى كان من تحت ميت
واللى كان من فوق كفيف

دا شعور سخيف
وشعور سخيف
إنك تكون رمز الشحاتة
تبنى مبنى للشحاتة
تعمل وزراة للشحاتة

يا ساقية دورى ... عدى فوقى ودوسى
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى أنا اتغميت

أنا اللى صاحب البيت
عايش بدون لازمة
ولما مرة شكيت
إدونى بالجزمة

أنا اللى زارعك دهب
بتأكلينى سباخ
إن كان دة تقل ودلع
بزيادة دلعك باخ
لا شفت فيكى هنا
ولا شفت فيكى ترف
كل اللى فيكى قرف

كرامتنا متهانة
واللقمة بإهانة
بتخلفينا ليه لما انتى كارهانا

يعنى ايه تبقى إنتى هبة النيل يا مزة
وكل يوم المية تقطع
يعنى ايه لما اشتكى غلو الفاتورة
يقولو تشكى بس تدفع

لما قش الرز ثروة بتتحرق
وأما نفط الأمة ثروة بتتسرق
وأما جلادك على ولادك بيبطش
وأما علمك ما يلاقيش يآكل فيطفش

يعنى ايه نرفع ايدينا بالسلام لجل الغزاة
ويعنى ايه لما ابقى ماشى فى حالى اتشد اشتباه
يعنى ايه لما اتحبس أربع سنين حبس احتياطى

يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته

أنا عمرى ما أتأمرت
ولا حطيت شروطى
ومكان ما ترسى مركبك
بابنى شطوطى
أنا كنت جيشك لما مماليلك باعوكى
وكنت يوسف لما عشتى سنين عجاف
وضلوعى دى اللى فى معركة قادش حموكى
وشفايفى دى اللى ما بطلتش فى يوم هتاف
دة انا كل شبر فى أرضك اتمرمغت فيه
وكل يوم عشتيه
أنا اتغذبت بيه

بتكرهينى عيونك السودة
وأيامى اللى فاتت
مانتيش حبيبيتى من النهاردة
حبيبنتى ماتت

علا صوت أدانك جرس
فى الشدة صاحينلك
من امتى كانوا الحرس
هما اللى باقينلك

بعتينى علشانهم
وعنيكى معصوبة
ياهلترى خاينة
ولا زيى مغصوبة

كل الكلام اتقال
والشعر بقى ماسخ
والصبر علو جبال
والظلم شىء راسخ
وطن وغرقان فى النطاعة
كل شىء ريحته نطاعة

علمونا بالعصاية
ورضعونا الخوف رضاعة
علمونا فى المدارس
يعنى ايه كلمة قيام
علمونا نخاف من الناظر
فيتمنع الكلام
علمونا ازاى نخاف
وازاى نكش
بس نسيوا يعلمونا الاحترام
فمتزعلوش
لما ابقى مش باسمع كلامكم
وماتزعلوش لما ابقى خارج عن النظام

مستنى ايه من طفل ربوه بالزعاق
غير المشاكل والخناق
كل اللى بيقولك بحبك دول نفاق
أنا لما قلت لك بحبك
كان نفاق

الحب يعنى اتين بيدوا
مش ايد بتبنى وستميت تيت تيت يهدو
الحب حالة
الحب مش شعر وقوالة
الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى أعيش علشان هدف
علشان رسالة
يعنى احس بقيمتى فيكى
إنى مش عايش عوالة

يعنى لما اعرق تكافئيى بعدالة
الحب حالة
الحب مش شعر وقوالة

الحب حاجة ما تتوجدش فى وسط ناس
بتجيب غداها من صناديق الزبالة

بارت مراعينا والبئر قد جفَ
والجوع يكوينا والصبر ما كّفى
والقلب لا يهدا والجرح لا يشفى
ولأننا طوع
زنا لهم خفا
جاءوا بموكبهم
واشتغلت الزفة

الدفة مظبوطة
وأصلا مافيش دفة
والكفة مش مايلة
علشان مافيش كفة

و جحا اللى جاى بالليل لساه بيتخفى
شايف ديدان الغيط سارحة ومارحماشى
من جبنه شاف الدود سابه وراح ماشى
ولا اتكسف للناس
ولا حس على طوله
الناس عشمها كبير جريوا بيشكوله
ضحك جحا ضحكة مواشى
مادام بعيد عن طينى ... ماشى

الدود قاعد لك يا جحا ولابد فى طينك
بعد ما يمص فى دمانا مش حيحلاله الا طينك

احنا اهلك
احنا رجالتك
أمانك
إحنا وقت الشدة سندك
إحنا زادك


يا جحا احمى ولادك
لو كنت عايز تحمى طينك
سوف أرحل
ربما يلقانى من ارجو لقاه
هامشى ويا الشحاتين

وابكى على حلمى اللى تاه
بس مش هاشحت رغيف
هاشحت وطن لله
*********************

مفيش تعليق ينفع يتقال بعد الكلام ده ؟؟؟

صح ؟؟؟

مع احترامي ليك اللي يشتم ويهزأ في وطنه
ميستحقش ان يفضل فيه
ويروح يدور علي وطن تاني
ولو لقي أحسن منه مايرجعش تاني
انا فعلا قريت الموضوع ده علي يلا كورة لكن
صراحة معجبنيش
اعتقد احنا اللي عملنا في مصر كده

المواضيع كلها حلوة اللي منزلها انهاردة بس انا مش فاضية بكرة ان شاء الله
هتلاقي التعليقات عالمواضيع الباقية

ومع احترامى ليكى برضو يا سندريلا الكلام دا مش غلط

ومش معنى ان واحد تعب من بلده من كتر المعاناه يبقى يسيبها ويروح مكان غيرها اصلا مينفعش دا انتى لما تيجى الغردقة بتقولى عاوزة اسافر بلدى مع ان بلدك دى كلها مشاكل بس ف الاخر بلدك وعاوزة ترجعيلها

يبقى ازاى الواحد يهاجر!!

الصراحة انا معاه ف كل الكلام اللى قاله

ممكن نكون احنا مش حاسين باللى بيحصل

بس مش هو لوحده اللى بيشكى من لفساد والظلم دى ناس كتير غيره

ودة اكبر دليل ع ان للى بيحصل ف مصر مش هين

ودة رائى

اوك هو مش هين بس انتوا بتعملوا حاجة
للبلد دي علشان اللي بيحصل فيها يخف شوية أكيد لأ ابسط حاجة روح رشح
اللي تشوفه أحسن للانتخابات وبما انكوا كملتوا قبلي 18 سنة فحد
فيكوا فكر يطلع بطاقة انتخابية ما فتكرش
ويوم ما حد يجي يشتم علي مصر من بره بتزعلوا
ما انتوا اللي بتشتموا قدامهم
يبقي ازاي مش عايزينهم يعايرونا بمشاكلنا حل المشاكل
مش اننا نشتم في مصر هو ده قصدي
وانا لما بكون عايزة امشي من الغردقة بكون انا عايزة امشي
من مكان انا قاعدة فيه مش برضايا علشان كده بنزل بلدي اللي فيها راحتي
اللي مفتكرش في يوم لحد دلوقتي اني شتمت عليها او مفتكرش
حتي ممكن يحصل اني اشتم عليها
وقصدي يروح يهاجر هيلاقي نفسه في مجتمع غريب عليه بيتعذب فيه أكتر من
من بلده
والخلاف في الرأي لا يفسد للود قضية

والله انا فكرت اعمل بطاقة انتخاب بس عاوزة انتخب مرشح واحد بس هو راجل كويس بصراحة و الباقين كلهم ......... ف مش عارفة انتخب مين مع الراجل دا و الجميع سواسية بس ان شاء الله هانتخب

ومتفقة مع محمد ف رأية الناس دى تعبت من الظلم اوىىى

تقبلو مرورى

طيب مش هتقوليلنا هتنتخبي مين ولا أيه

انا مش بفكر اعمل بطاقة انتخابية

ولو عملت هركنها

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

شوفت الكل بيشتم وعايز الحياة تتصلح
ما يمكن صوتك كان ممكن يكون في نجاح انسان ربنا باعته
ينتشلنا من الضياع اللي أحنا فيه

ما اظنش !!!!!!!!!!!!!!!!!!

ليه ما تظنش يعني
هو في حد فينا يعرف ربنا مخبي علينا ايه

انا شوفت كتير وعرفت كتير عن حكاية الانتخابات دى واللى بيحصل فيها من مصالح فردية

فمعلش مافيش حد فيهم يملى عينى او ممكن ينفعنى انا

بصراحة فى مرشح هنا كويس جدا حتى من غير انتخابات ولا مجالس بيعرف ناس كتير اوى وبيساعد كتير اوى وكتير جاب علاجات ع نفقة الدولة وحاجات زى كده من غير م يكون عضو ولا حاجة بس واحد والباقين ولا واحد منهم عاجبنى

وانا معاكى ف ان الواحد يمارس حقه حتى لو محدش اخد بكلامه بس هيحس انه بيعمل اللى عاوزة

عنك حق ياسي لوفر في كلامك والله